Jack Ma បាន​លក់​រូបគំនូរ​ដំបូងបង្អស់​របស់គាត់ ក្នុងតម្លៃ ៥.៤​លាន​ដុល្លារ​អាមេរិក កាលពីពេល​ថ្មីៗ​កន្លងទៅនេះ នៅក្នុង​ការដេញថ្លៃ នៅ Sotheby ដែល​តម្លៃ​លក់​នេះ គឺ​ស្មើនឹង ១៧​ដង​នៃ​ការប៉ាន់ស្មាន​ទុក​។​

​តាំងពី​ចាប់ផ្តើម​រៀន​គូរគំនូរ​ក្នុង​ឆ្នាំ ២០១៣ មកដល់​បច្ចុប្បន្ន វា​ជា​លើកដំបូង​ហើយ ដែល​លោក Jack Ma បាន​គូរគំនូរ​រូប​ផែនដី​នេះ ជាមួយនឹង​មិត្ត​របស់គាត់​ឈ្មោះ Zeng Fanzhi ដែលជា​វិចិត្រករ​ជនជាតិ​ចិន​ដ៏​ចំណាន ហើយ​លោក Jack Ma បាន​ពន្យល់ថា យើងទាំងអស់គ្នា​ជា​អ្នកបង្កើត​ភពផែនដី​នេះ យើង​មាន​តួនាទី​ការពារ​ផែនដី ការពារ​មហាសមុទ្រ ការពារ​ខ្យល់អាកាស និង​ការពារ​ទឹក​។​

​គំនូរ​នេះ​ត្រូវបាន​លក់​ទៅ​ឲ្យ​វិនិយោគិន​ជនជាតិ​ចិន លោក Qian Fenglei ហើយ​ប្រាក់​នេះ នឹង​បរិច្ចាគ​ជូន ស្ថាប័ន​អភិរក្ស​បរិស្ថាន Paradise International Foundation ដែល​គាំទ្រ​ដោយ Jack Ma ក្រុម​សប្បុរសជន​និង​វិនិយោគិន​ចិន ហើយ​វា​ក៏​ជា​យុទ្ធសាស្ត្រ​ជម្រុញ​ឲ្យ ពិភពលោក​បាន​ស្គា​ល់ពី​ក្រុម​អភិរក្ស​បរិស្ថាន​របស់​ពួកគេ​ផងដែរ​។​

​គួរបញ្ជាក់​ផងដែរ​ថា ក្រុមហ៊ុន​យក្ស Alibaba ទើបតែ​សម្រេច​ទិញ ក្រុមហ៊ុន​កាសែត​ដ៏​ល្បីល្បាញ​របស់​ហុងកុង គឺ South China Morning Post ក្នុងតម្លៃ ២៦៦​លាន​ដុល្លារ​អាមេរិក ក្នុង​គោលបំណង​ផ្សព្វផ្សាយ​ព័ត៌មាន​ដ៏​ទូលំទូលាយ ច្បាស់លាស់ និង​វិភាគ​ពី​ហេតុការណ៍​សំខាន់ៗ​ក្នុង​ហុងកុង និង​ចិន​៕

​ប្រភព​៖ BusinessCambodia

​